A la seguida d’un article paregut dins lo jornau Var Matin pertocant lo vilatge de Rocbaron amé l’entrevista dau cònsol, Libertat voldriá reactar per aquest comunicat.
De 780 estatjans en 1982, lo vilatge de Rocbaron (Var, Provença) a encuei depassat lei 4 500 amas. Podèm constatar qu’es la meme causa sus tot lo canton de La Roca-Brussana amé l’explosion demografica en aumentacion constanta. Alors que lo cònsol M. Felix es constantament atacat per leis associacions e de nombrós estatjans de la comuna, aquest darrier ausa declarar dins la presma locala « des choix stratégiques ambitieux qui font de Rocbaron une exception dans le marasme ambiant. » maugrat un chaple ecologic e un desvelopament anarchiq au mespretz dei tèrras agricolas, Joan-glaudi Felix contunha la sieuna propaganda ultrà-liberala au dam de nòstre patrimòni e de la cultura nòstra.
Lei rocbaronés an jamais volguts que lo vilatge devenga una vila-dormidor, va de meme per lo canton de la Roca-Brussana e de tota Provença. Ont’es passada la cultura dau Pais, l’agricultura, la solidaritat e lo sociau ? Aquelei son lei projècts dei cònsols per nostra region ? Un territòri per quadres que vòlon viure a la campanha mai aguer dei marcats de luxe a costat de l’ostau ? Aquo, lei provençaus ne’n vòlon pas !
L’eslogant dau cònsol de Rocbaron " Vivre à la campagne sans perdre les commodités de la ville " es un atrapa colhon. La vision de la municipalitat pertocant lo desvelopament es una vertadiera sacamandeg qu’engendra un molonas de problemes pertocant leis escolas, lo tractament deis aigas, d’urbanisma , la circulacion de veitures e de camions deveneguda descontrarotladís.
Lo cònsol parla de creacions d’emplecs, segur, mai au dam de l’environament. Lo rapòrt entre creacions d’emplecs e lo nombre d’ estatjans es falsat perque a la basa, Rocbaron erà un vilatge e ges de cas una vila, d’alhors força de gens podan pas abitar a Rocbaron (loguier trop car o pas de lotjaments disponibles). Es adonc, un cop de mai, lei gens dau Pais, que trabalhan e vivon aici que son penalisats par aquest politica de desvelopament liberau. Solet lei promoveires son ganhaires.
A tèrme lòng, es 6 500 estatjans que lo Mestre Felix vòl faire venir sus la comuna e quant dins leis autreis comunas ? Que restarà dei tèrras agricolas dins l’avenir ? Lo terraire ? Li a lo project de l’ostau de Pais….una galejada per mostrar una Provença de carta postala per torisme , lo cònsol oblida que lo torisme n’agrada pas lo betum…
